D.i.khan

 D.i.khan

   ڈپٹی کمشنر ڈیرہ عارف اللہ نے کہا ہے کہ عوام کو سہولیات کی فراہمی ترجیحات میں شامل ہے لہذا تمام محکمے اس حوالے سے اپنا کردار ادا کریں تاکہ عوام کو درپیش مشکلات کا ازالہ کرنے کے ساتھ ساتھ تمام ممکن سہولیات کی فراہمی کو یقینی بنایا جا سکے۔ان خیالات کاا ظہار انہوں نے آج اپنے دفتر کے کانفرنس ہا ل میں لائن ڈیپارٹمنٹس کے افسران سے تعارفی اجلاس کے موقع پر کیا۔اجلاس میں ایڈیشنل ڈپٹی کمشنر محمد اسحاق وزیر، محکمہ صحت، تعلیم، کھیل، انڈسٹریز، فشریز، ڈبلیو ایس ایس سی، رسکیو 1122، ٹی ایم اوز، لائیو سٹاک، حلال فوڈ اتھارٹی، لوکل گورنمنٹ، فوڈ، پبلک ہیلتھ انجینئرنگ، پاپولیشن ویلفیئر، سوشل ویلفیئر، آن فارم واٹر منیجمنٹ، ایریگیشن، زراعت و دیگر متعلقہ محکموں کے افسران و نمائندوں نے شرکت کی۔اجلاس کے دوران لائن ڈیپارٹمنٹس کے افسران نے ڈپٹی کمشنر کو محکمانہ کارکردگی سے متعلق بریفنگ دی۔اس موقع پر خطاب کرتے ہوئے ڈپٹی کمشنر نے کہا کہ اس اجلاس کا مقصد افسران سے تعارف تھا۔ تمام محکمے بہتر کام کر رہے ہیں اور اسی طرح کام کرتے رہیں بلکہ عوام کو ریلیف فراہم کرنے کیلئے تمام کاوشیں بروئے کار لائی جائیں۔انہوں نے کہا کہ اچھی کارکردگی کا مظاہرہ کرنے والے محکموں کی حوصلہ افزائی کی جائیگی۔ڈپٹی کمشنر نے محکمہ خوراک کو ہدایت کی کہ آٹے کی دستیابی کو یقینی بنانے کے ساتھ ساتھ آٹے میں موجود نمی اور گرائینڈنگ کے عمل کی نگرانی کیلئے ٹیمیں تشکیل دی جائیں تاکہ لوگوں کو معیاری آٹے کی فراہمی یقینی بنائی جا سکے۔انہوں نے کہا کہ سستا بازار کو کامیاب بنانے کیلئے تمام متعلقہ محکمے اپنا کردار ادا کریں تاکہ لوگوں کو ریلیف فراہم کیا جا سکے۔محکمہ زراعت کو ہدایت کی کہ گرین سٹال کا فوری آغاز کیا جائے۔انہوں نے کہا کہ کورونا وائرس کے تدارک کے سلسلے میں تمام متعلقہ محکموں بالخصوص محکمہ صحت کا کردار قابل ستائش رہا ہے۔انہوں نے کہا کہ پناہ گاہوں کی نگرانی میں محکمہ سوشل ویلفیئر کا کردار بہت اہم ہے کیونکہ یہاں غریب اور نادار افراد کو شیلٹر فراہم کیا جاتا ہے لہذا اس حوالے سے مزید سہولیات کی فراہمی کیلئے اقدامات کیے جائیں گے۔انہوں نے کہا کہ تمام لائن ڈیپارٹمنس اچھی کارکردگی کا مظاہرہ کر رہے ہیں لہذا ضلعی انتظامیہ کی جانب سے ہر ممکن معاونت حاصل رہے گی۔